Fanyeni Kazi kwa Bidii kwa Kutumia Taaluma zenu-DC Mbarali

Tarehe ya Kuanza: January 30th, 2021

Hayo yamesemwa na mkuu wa Wilaya ya Mbarali Mhe. Reuben Mfune alipokuwa akiongea na Wenyeviti wa Bodi za Shule za Sekondari, Waratibu Elimu Kata pamoja na Wakuu wa Shule za Sekondari kwenye kikao cha tathimini ya matokeo ya mitihani ya Taifa ya kidato cha Sita, kidato cha Nne pamoja na Kidato cha Pili siku ya tarehe 29/01/2021 katika ukumbi wa shule ya Sekondali Rujewa.

Katika kikao hicho Mhe. Mfune amewataka walimu wote kufanya kazi kwa bidii, weledi na kwa kutumia vizuri taaluma zao ili kuongeza ufaulu kwenye mitihani inayokuja.

“Tunajituma sana, ila kama tunajituma bila ubunifu ni sawa na sifuri, na hatutaweza kusonga mbele. Pamoja na mafanikio tuliyoyapata tusiamini kwamba hapa tulipo tumefika, tuendelee kufanya kazi kwa bidii na ubunifu mkubwa ili tuongeze kiwango cha ufaulu”

“Mimi pamoja na viongozi wenzangu wa Wilaya ambao tumekuwa tukihudhuria vikao mbalimbali tumechoka kuwapigia wenzetu makofi, kwa nini iwe hivyo siku zote? ifike muda na sisi tuwe tunapigiwa makofi kwa ufaulu mkubwa na kushika nafasi za juu.” Alisema Mfune.

Mkurugenzi Mtendaji wa Halmashauri ya Wilaya ya Mbarali Ndg. Kivuma Msangi alisema kwamba kwa sasa Mbarali kuna shule nyingi za Serikali zimeongezeka za binafsi na za Serikali.

Ndg. Msangi aliongeza kuwa walimu wote watakaokuwa wanafaulisha wanafunzi kwenye masomo wanayofundisha ufaulu wa daraja A na B watakuwa wanapatiwa zawadi kama motisha na Ofisi yake.

“Mbarali tuliikuta ina shule 16 za sekondari za Serikali, mwaka 2019 tumeongeza shule 2, mwaka 2020 tumeongeza shule 6 na mwaka huu 2021 tunaongeza shule 4. Kati ya shule hizo nne shule moja itakuwa ni wa wasichana tupu itakayoitwa Uturo Girls ambayo itakuwa inachukua wasichana 80 bora. Baada ya kumaliza hiyo tutajenga na ya wavulana ambayo pia itakuwa inachukua wavulana 80 bora” Alisema Msangi.

Mkuu wa Idara ya Elimu Sekondari wa Halmashauri ya Wilaya ya Mbarali Bi. Anna Shitindi alisema kuwa kwa mwaka 2021 ofisi yake imejipanga kuongeza ufaulu kwa wanafunzi wote wa shule za sekondari kwa kuhakikisha wanaandaa mitihani ya awali kabla ya mitihani ya taifa, kuhakikisha shule zote zinatoa chakula cha mchana, kufanya ufuatiliaji wa mara kwa mara kwa shule zote  pamoja na kutoa tuzo kwa wananfunzi na walimu watakaofanya vizuri

Bi. Shitindi aliongeza kuwa sasa kuna jumla ya shule 32 za Sekondari, kati ya hizo, shule 24 ni za Serikali na shule 7 ni shule zisizo za Serikali vilevile shule za kidato cha tano za sita zimeongezeka kutoka shule 3 kwa mwaka 2019 hadi shule 5 mwaka 2021.

Katika kikao hicho majadiliano ya kina yalifanyika na maazimio kuwekwa kwa ajili ya kuboresha Taaluma kwa shule za sekondari.

MWISHO