Marufuku Kufanya Mikutano ya Hadhara- Mfune

Tarehe ya Kuanza: March 17th, 2020

Mkuu wa Wilaya ya Mbarali Mhe. Reuben Mfune amepiga marufuku kufanyika kwa mikutano yote ya hadhara ikiwa ni sehemu ya jitihada za kuepukana na maambukizi ya ugonjwa wa Corona kwa wananchi wote wa wilaya ya Mbarali.

Mhe. Mfune amepiga marufuku hiyo siku ya tarehe 17/03/2020 kwenye mkutano aliouitisha kwa ajili ya kupeana Elimu na kuongeza uelewa juu ya maambukizi ya ugonjwa wa Corona kwa taasisi na mashirika aliyoyaarika katika ukumbi wa Polisi ulipo Kata ya Rujewa.

“OCD kuanzia leo nakuagiza kutotoa kibali cha aina yoyote kwa ajili ya mikusanyiko ya mihadhara. Sitaki kuona mihadhara ya aina yoyote wilayani kwetu mpaka pale tutakapotangaza. Kwa viongozi wa dini na waumini waataendelea kusali katika ibada zao za kawaida lakini sio mihadhara.”

“Mhe. Rais ametaangaza kuahirishwa kwa Mbio za Mwenge wa Uhuru mpaka pale itakapotaangazwa vinginevyo, Mkurugenzi wa Halmashauri na mganga mkuu nawataka fedha tulizokuwa tumeziandaa kwa ajili ya Mbio za Mwenge wa Uhuru tuzitumie kununua vifaa kwa ajili ya kujikinga na Corona na viwekwe kwenye taasisi mbalimbali zikiwemo pale Ofisi ya Mkuu wa Wilaya na Halmashauri." Alisema

Mhe. Mfune amegiza dawa zote za kinga za kuweka kwenye maji ya kunawa mikono ziuzwe kwa bei nafuu kwenye duka la dawa la Serikali ili kurahisisha upatikanaji wake.

Vilivile Mkuu wa Wilaya ameagiza kutolewa maelekezo ya kuwepo kwa vifaa maalumu ikiwemo vyombo vya kunawia maji yanayotiririka kwenye taasisi mbalimbali na mikusanyiko pamoja na kutolewa kwa elimu kwenye misiba na amekataza misiba hiyo kuchukia kipindi kirefu hadi siku ya mazishi na kusisitiza kuwa mazishi yakishafanyika watu watawanyike wabakie ndugu wa karibu tu.

Kwa upande wake Mwenyekiti wa Chama Cha Mapinduzi (CCM) Wilaya ya Mbarali Ndg. Hashim Mwalihawa alisema kuwa elimu na uangalizi inapaswa kufanyika kwa nguvu katika maeneo ya starehe hususani kwenye maeneo ya vileo kwa kuwa watu wengi mara baada ya kutumia pombe hujisahau na kudharau maelekezo wanayopewa ya kujikinga na maradhi.

Aliongeza kwamba kupitia hali hiyo ni rahisi kwa watakaopata maambukizi kuyapeleka na kuyasambaza kwenye jamii mpaka majumbani mwao kitu ambacho kitahatarisha afya za familia zao.

Mganga Mkuu wa Halmashauri ya Wilaya ya Mbarali, Dkt. Godfrey Mwakalila alisema kwamba, yapo maeneo tayari yameshatengwa kwa ajili ya watu watakaoshukiwa kuwa na maambukizi ya corona wakati taratibu za kusafirisha sampuli kwa ajili ya vipimo zikiendelea.

Dkt Mwakalila amesisitiza umuhimu wa kuchukua tahadhari ya maambukizi kwa wanajamii kuwa mbali na washukiwa wa maambukizi akisema hata kama wanawapenda sana ndugu zaao ni muhimu watu kutambua kuwa dunia inapita katika kipindi kigumu na kinacholazimu kila mmoja kuchukua tahadhari.

Mkutano huo wa kutoa elimu na tahadhari ya ugonjwa wa corona umewajumuisha Viongozi wa dini, Kamati ya siasa wilaya ya Chama Cha Mapinduzi, Kamati ya Ulinzi na Usalama Wilaya, Waheshimiwa Madiwani, Wakuu wa Idara wa Halmashauri, Maafisa Tarafa, Watendaji wa Kata, NGO’s, Wazee Maarufu, Viongozi wa Wafugaji na Wakulima, Vyama vya siasa, Viongozi wa Taasisi mbalimbali wakiwemo, TANAPA, TAWA, TFS, TRA, RUWASA, TARURA, CRDB na NMB

Mwisho