PESCODE VICOBA YATOA MEZA NA VITI 52 MBARALI

Tarehe ya Kuanza: February 26th, 2021

Shirika lisilokuwa la Kiserikali linalojihusisha na utoaji wa elimu  ya uanzishwaji wa vikundi vya kijamii vinavyojishughulisha na uwekaji wa akiba, kukopesha sambamba na kutoa elimu ya usimamizi, ujasiliamali, mafunzo ya uongozi pamoja na uandaaji wa taarifa (PESCODE VICOBA) kwa kushirikiana na vikundi vya VICOBA  Mbarali wametoa msaada wa Viti na Meza 52 vyenye thamani ya kiasi cha shilingi 2,080,000 kwa shule ya sekondari ya Igomero siku ya tarehe 26/02/2021.

Akipokea Viti hivyo pamoja na Meza Mkuu wa Wilaya ya Mbarali Mhe. Reuben Mfune amelishukuru shirika hilo la PESCODE VICOBA pamoja na vikundi vya VICOBA vilivyoshilikiana kutengeneza madawati hayo kwani kufanya hivyo kunaonesha nia ya kusaidia ukuaji wa elimu wilayani hapa.

“Kwanza  nawashukuru kwa kupata wazo la kutengeneza madawati, hili wazo limetokana na nyie wenyewe, hamjashinikizwa na mtu yeyote lakini mkaona kuna umuhimu wa kusaidia wanafunzi. Kupitia madawati haya vijana wetu 52 watakaa na kufanya shughuli zao za kusoma vizuri bila tatizo lolote.”

“Kuna taasisi nyingi zenye uwezo hazijaweza kufanya kama mlivyofanya nyie ambao sio taasisi kubwa, kutoa sio utajiri bali ni moyo, msichoke kusaidia jamii kwani kwa sasa wanafunzi wanaojiunga kidato cha kwanza wanaongezeka kwa kasi kila mwaka.  Ningependa siku nyingine tuitane kwenye jambo kubwa zaidi.” Alisema Mfune

Kaimu Mkurugenzi wa Halmashauri ya Wilaya ya Mbarali Bi Anyubatile Seme amelishukuru shirika hilo kwa kuacha alama hasa kwenye akili za wanafunzi kwani kitendo cha kutoa madawati 52 ni kikubwa sana na ni chachu kwa mashirika menginge kuiga mfano  huo mzuri kwani walichokifanya PESCODE VICOBA kitasaidia kupunguza uhaba wa madawati.

Akisoma Risala kwa niaba ya wanachama wa vikundi vya VICOBA, Bwana Elieza Kagusi alisema kwamba PESCODE VICOBA ilianza kufanya kazi katika Wilaya ya Mbarali mwaka 2014 katika kata 13 na mpaka sasa wameanzisha na kusimamia vikoba 50 ambavyo vipo kata za Mahongole, Madibira, Ubaruku, Rujewa, Lugelele, Mapogoro, Chimala, Ihahi, Itamboleo, Utengule Usangu, Igurusi na Kongoro Mswisi.

Bwana Kagusi aliongeza kuwa shirika lao linajishughulisha na utoaji wa elimu  ya uanzishwaji wa vikundi vya kijamii vinavyojishughulisha na uwekaji wa akiba, kukopeshana na pia kutoa elimu ya usimamizi, ujasiliamali, mafunzo ya uongozi pamoja na uandaaji wa taarifa

Katika Halfa hiyo ya makabidhiano Mkuu wa Wilaya ya Mbarali Mhe. Reuben Mfune amewashukuru wananchi wote wa Mbarali wanaohamasika katika ujenzi wa miundombinu ya shule za sekondari pamoja na uchangiaji wa madawati kwani kwa sasa hali inaridhisha.