SERIKALI KUTIA NGUVU UJENZI WA VITUO VYA KUTOLEA HUDUMA ZA AFYA, MAJI

Tarehe ya Kuanza: October 2nd, 2019

Mkuu wa Wilaya ya Mbarali  Mhe. Reuben Mfune amewataka wananchi wote wa wilaya ya Mbarali kuanzisha ujenzi wa vituo vya kutolea huduma za afya katika maeneo yao ili serikali iweze kuongeza Nguvu.

Ameyasema hayo siku ya tarehe 01/10/2019 kwenye maadhimisho ya siku ya wazee duniani yaliyofanyika kiwilaya katika kata ya imalilo songwe.

“Kuhusiana na suala la maji, serikali ya awamu ya tano, imeunda wakala wa maji vijijini kwa ajili ya kufanyia kazi kwa kina tatizo la maji, tuwe na subira kidogo, mambo mazuri yanakuja na kuhusiana na huduma za afya, anzisheni ujenzi wa vituo hivyo ili serikali ije iongeze nguvu, kwani serikali haiwezi kufanya kila kitu.”

Katika maadhimisho hayo Mhe. Mfune alisema kuwa Serikali inatambua umuhimu wa wazee waliopo  katika maeneo mengi ya nchi kwani wazee ni watu muhimu katika maendeleo ya nchi yetu,  Wazee ndio waliojenga misingi bora kabisa tunayoiona hivi sasa.

Aliongeza kuwa, Serikali imekuwa ikitoa gawio la fedha kupitia mradi wa TASAF kwa ajili ya kujikimu katika maeneo mbalimbali,  kuna baadhi ya wazee wanatumia fedha hizo  kuanzisha miradi, kama ujenzi wa nyumba, ufugaji kwa ajili ya kuboresha maisha yao, na wengine wamezitumia kusomesha watoto.

Katika Risala yao iliyosomwa na Katibu wa Baraza la Wazee Wilaya, Ndg. Hezron Kapwela alisema kuwa  maeneo mengi hayana hospitali, vituo vya afya wala zahanati kitu kinachosababisha  wazee kutembea umbali mrefu, Maeneo mengi hayana huduma za maji safi na salama pamoja na Wazee  wanufaika  malipo ya TASAF hawajapewa malipo ya fedha toka mwezi Machi, 2019 mpaka leo hii. 

Kauli mbiu ya maadhimisho ya siku ya wazee mwaka 2019 ni “TUIMARISHE USAWA KUELEKEA MAISHA  YA UZEENI”