Tuache kupeleka kadi zetu za BANK kwa watu wa mitaani-Msangi

Tarehe ya Kuanza: October 6th, 2019

Mkurugenzi Mtendaji wa Halmashauri ya Wilaya ya Mbarali Ndg. Kivuma H. Msangi, amewaasa baadhi ya walimu wanaopeleka kadi zao za  Bank (ATM) kwa watu wa mitaani kama dhamana ili waweze kukopeshwa fedha kuacha mara moja kwani shida haziishi na fedha hazijawahi kutosha vilevile wanaidhalilisha kada ya ualimu.

Ameyasema hayo siku tarehe 05/10/2019 kwenye maadhimisho ya siku ya walimu duniani ambapo kiwilaya yamefanyika katika kata ya Rujewa.

“Walimu wengi wamekuwa wakifundisha katika mazingira magumu, moja ya sifa ya Walimu ni ustahimilivu, vilevile Walimu ni watu wa kujitolea, kupitia hayo yote kada ya ulimu imekuwa na umuhimu na ina heshima, hata viongozi siku zote wamekuwa wakiwakumbuka walimu waliowafundisha. Walimu msikate tamaa, tunafahamu kuwa mazingira yenu ya kazi ni magumu”

Naye katibu wa Chama cha Walimu (CWT) Wilaya ya Mbarali Bi. Melea Nyang’uye alisema kuwa, siku ya Walimu Duniani ilianzishwa na Rais wa India mwaka 1967 na ikawa inaazimishwa katika siku ya kuzaliwa kwake yaani tarehe 5 Septemba lakin baadae ikabadilishwa na kuwa tarehe 5 Oktober na kwa upande wa Tanzania Chama cha Walimu kilianza rasmi mwaka 1996.

Bi. Melea amewataka Walimu kuishi katika maadili ya kazi zao kwani zamani mitihani ya darasa la saba ilkuwa inatumwa kwenye bahasha ya kaki na hakukuwa na ulinzi wala mtu wa kuilinda kwa sababu Walimu walikua na maadili mazuri lakin siku izi mitihani hyo inafungwa pamoja na ulinzi mkali na silaha za moto na hii ni kutokana na kuporomoka kwa maadili ya Walimu ikiwemo swala la kuvujisha mitihani.

Katibu Msaidizi wa Tume ya Utumishi wa Walimu (TSC) Wilaya ya Mbarali Ndg. Issa Shemgei alisema kwamba msingi mkubwa wa siku ya Walimu ni sherehe na tafakuri ya jinsi gani ya kuenenda majukumu yao kwani kwa miaka kadhha ya nyuma alikuwa anapokea kesi zisizopungua 20 kwa mwaka za utovu wa nidhamu kwa walimu, lakini mwaka 2018 -2019 kesi zimepungua na ameweza kupokea kesi 6 tu ambapo kati hizo walimu 3 wamefukuzwa kazi na amewapongeza Walimu kwa kujitambua na kufanya kazi zao za msingi kwa weledi.

Maadhimisho yalianza kwa kwenda kutoa huduma katika Hospitali ya Wilaya ya Mbarali ambapo walitoa zawadi kwa wagonjwa waliolazwa, kufanya usafi eneo la Hospitali pamoja na kuchangia Damu. Sambamba na hilo kulikuwa na michezo mbalimbali kama, Kuvuta Kamba, kukimbia kwenye magunia, kukimbia na Gololi zikiwa kwenye Kijiko, kukimbiza Kuku, kucheza Draft pamoja na kucheza Bao.

MWISHO