WATENDAJI MBARALI WASAINISHWA MIKATABA YA LISHE KUOKOA AFYA YA MAMA, MTOTO

Tarehe ya Kuanza: July 24th, 2019

Watendaji wa Kata zote 20 zilizopo ndani ya Wilaya ya Mbarali, wametia saini mkataba wa kulinda Afya ya Mama mjamzito, mama anaenyonyesha pamoja na Mtoto mwenye umri wa chini ya miaka mitano  katika maeneo yao siku ya tarehe 23/07/2019 ikiwa ni muendelezo wa zoezi lililoanza katika ngazi ya Taifa, Mikoa, Wilaya na sasa ngazi ya Kata na Vijiji.

Akiongea katika zoezi hilo la kutiliana saini, Mkuu wa Wilaya ya Mbarali Mhe. Reuben Mfune alisema pamoja na jitihada zilizochukuliwa na Serikali pamoja na wadau wa maendeleo, hali ya utapiamlo na udumavu  bado ni kubwa hususani katika makundi ya watu wenye mahitaji maalumu ya lishe.

Aliongeza kuwa ukishakosea mwanzoni katika siku za mwazo ambazo ni siku 1000 tangu kutungwa kwa mimba  hakuna tiba na unaweza ukamlaumu kila mtu kuhusu maendeleo ya mtoto na kupelekea kuwaonea wivu watoto wa wengine watakavyokuwa wanafanya vizuri darasani.

“Katika mikutano yote Waheshiwa Madiwani, tumieni mikutano hiyo kuelezea masuala ya lishe, lishe iwe agenda ya kwanza, muwatengee wataalamu wa  lishe katika maeneo yenu muda wa dakika 10 ili waeleze kwa kifupi masuala ya lishe  kwani  watoto wanazaliwa kila siku, hili ni jambo endelevu ambalo halitafika mwisho”

“Walengwa wakuu wa mkataba wa lishe ni watendaji wa kata, watendaji wa vijiji pamoja na maafisa maendeleo ya jamii kama waratibu wa masuala ya lishe kwa ngazi ya kata na vijiji ili kukamilisha hatua zote za uwajibikaji na usimamizi wa utekelezji wa masuala yote ya Lishe kwa ajili ya kuokoa Taifa.”

“Ninawaagiza kuhakikisha yale yote yalioandikwa kwenye mikataba yenu yanatelezwa na kusimamiwa kwani tathinimi itafanyika hadi kwenye ngazi ya kijiji. Ili tuwe na  watu wabunifu, wenye ujuzi wa kutosha kwa maendeleo ya Taifa suala la lishe ni jambo muhimu sana  ” alisema

Mkutano huo wa kutiliana saini kati ya Mkuu wa Wilaya, Mkurugenzi Mtendaji pamoja na Watendeji wa kata ulihudhuriwa na Waheshimiwa Madiwani, mwakilishi wa shirika lisilo la kiserikali la CRS, Afisa Lishe kutoka ofisi ya Mkuu wa Mkoa, Maafisa maendeleo ya jamii pamoja na baadhi ya wataalamu kutoka ofisi ya Mkurugenzi mtendaji wa Halamashauri ya wilaya ya Mbarali.

Serikali inatekeleza mpango jumuishi wa Lishe wa Taifa wa miaka 5 ulioanza mwaka 2016/2017 -2020/2021 sambamba na kufanya tathimni ya utekelezaji wa makubaliano chini ya Ofisi ya Rais TAMISEMI kwani Waziri wa Nchi Ofisi ya Rais TAMISEMI aliagiza mikataba ya Lishe isainiwe na Watendai wa ngazi ya Vijiji pamoja na Kata

Suala la Lishe ni la kila Mwanadamu, ila mkataba huu unawahusu akina mama wajawazito, akina mama wanaonyonyesha pamoja na watoto ambao hawajafikisha umri wa miaka 5.
MWISHO