MKUU WA WILAYA YA MBARALI AKAGUA MRADI WA MAJI WA MIJI 28 RUJEWA.

Tarehe ya Kuanza: December 11th, 2025

Mkuu wa Wilaya ya Mbarali Mheshimiwa Brigedia Jenerali Maulid Hassan Surumbu amefanya ziara ya kukagua maendeleo ya mradi wa maji wa Miji 28 Rujewa unaotekelezwa kwa ushirikiano baina ya Serikali ya Tanzania na Serikali ya India wenye thamani ya bilioni 50 unaotarajiwa kukamilika mwezi February 2026. 

Mradi huo uliopo kwenye kata ya Lugelele unatarajiwa kuhudumia zaidi ya wananchi laki tatu kwenye kata ya Lugelele na Rujewa kwa upande wa Wilaya ya Mbarali lakini pia utanufaisha Miji ya Wanging'ombe na Makambako kwa upande wa Mkoa wa Njombe.

Akizungumza katika ziara hiyo, Mkuu wa Wilaya ya Mbarali, Brig. Jen. Maulid Hassan Surumbu amehimiza mkandarasi wa mradi kuongeza kasi ili uweze kukamilika kwa wakati.

"Wilaya ya Mbarali tumebahatika kupata mradi huu unaoenda kumaliza shida ya maji kwa wananchi wa Mbarali ambapo kwa awamu ya kwanza kata zitakazonufaika ni kata za Lugelele na Rujewa ambazo kwa sasa zinapata maji kwa asilimia 45 tu, mradi huu utakapokamilika February 2026 wananchi wa kata hizo watapata maji kwa asilimia 85. Tunamshukuru Rais wa Jamhuri ya Muungano wa Tanzania, Dkt. Samia Suluhu Hassan kwa kuendeleza uhusiano wa Tanzania na nchi ya India pia tunashukuru kwa kuhakikisha pesa za kumalizia mradi huu zinafika ", amesema Brig. Jen. Surumbu.

Kwa upande wake Mkurugenzi Mtendaji wa Mamlaka ya Maji na Usafi wa Mazingira Rujewa, Mhandisi Lestus Linda amesema kukamilika kwa Mradi huu utasaidia wananchi kupata maji safi na salama na kumaliza kabisa tatizo la maji kwa wananchi wa Lugelele na Rujewa.

"Kukamilika kwa Mradi huu utasaidia wananchi kupata maji safi na salama ambayo hayatakuwa na vumbi la maji kama ilivyo sasa pia uzalishaji wa maji utaongezeka na kutatua hali iliyopo sasa na ninawahakikishia maji yatapatikana kwa saa 24 kila siku ", amesema Mhandisi Linda.